Жорий йилда Ўзбекистонда 30,4 млрд сўмлик коррупцион ҳолат аниқланди
Қонун ҳужжатларига зид равишда чиқарилган 9 та ҳужжат бекор қилинган.
Коррупцияга қарши курашиш агентлигига жорий йилнинг 1 ярим йиллигида жами 1 169 та мурожаат келиб тушган бўлиб, шундан 1 134 таси кўриб чиқилиши таъминланган.
Мурожаатларни кўриб чиқиш натижалари бўйича тегишли вазирлик ва идораларга, вилоят (туман, шаҳар) ҳокимликларига 25 та сўровнома юборилган, қонунбузилиш ҳолатларини бартараф этиш юзасидан 15 та тақдимнома киритилган.
Мурожаатларни ўрганиш натижасига кўра, қонун ҳужжатларига зид равишда чиқарилган 9 та ҳужжат бекор қилинган. Агентлик томонидан тақдим этилган ҳужжатларга асосан ҳуқуқни муҳофаза қилувчи органлар томонидан 7 та жиноят иши, 4 та маъмурий жавобгарлик ва 2 та интизомий жавобгарлик тўғрисидаги ишлар қўзғатилган ва мавжуд хато-камчиликларни бартараф этиш чоралари кўрилган. Мурожаатларни ўрганишда аниқланган молиявий хато ва камчиликлар миқдори 30,4 млрд сўмни ташкил қилган.
Агентликка келиб тушаётган мурожаатларнинг аксариятида суд-ҳуқуқ соҳасидаги муаммолар, мансабдор шахсларнинг хатти-ҳаракатлари ва турли соҳаларда коррупсиявий ҳолатларнинг юз бераётганлиги тўғрисида ёзилган мурожаатлардан иборат.
Ҳудудлар кесимида таҳлил қилинганда, Тошкент шаҳар бўйича 350 та, Тошкент вилояти бўйича 123 та, Қашқадарё вилояти бўйича 101 та, Наманган вилояти бўйича 78 та, Самарқанд вилояти бўйича 78 та, Фарғона вилояти бўйича 56 та, Сурхондарё вилояти бўйича 53 та, Сирдарё вилояти бўйича 51 та, Навоий вилояти бўйича 51 та, Бухоро вилояти бўйича 50 та, Жиззах вилояти бўйича 47 та, Андижон вилояти бўйича 45 та, Қорақалпоғистон Республикаси бўйича 44 та, Хоразм вилояти бўйича 39 та, шунингдек, чет элдан 3 та мурожаат келиб тушган.
2022/2023-йилларда давлат харидлари соҳасида “Коррупсиясиз соҳа” лойиҳасини амалга ошириш юзасидан 28 та вазирлик ва идоралар таклифлари инобатга олинган ҳолда “Йўл харитаси” ишлаб чиқилган ва Коррупсияга қарши курашиш миллий кенгаши томонидан тасдиқланган.
Давлат харидларига оид қонунчилик талабларига риоя қилиниши юзасидан жами 10 та вазирлик, идора ва ташкилотларда ўтказилган ўрганишларда 1 143 та ҳолатда 48,5 млрд сўмлик молиявий хато ва камчиликлар аниқланган.
Мазкур хато ва камчиликлар 1 та ҳолатда 2,1 млрд сўмлик харид танлови талабларини бажармаслик, 4 та ҳолатда 8,3 млрд сўмлик харидларни қисмларга бўлган ҳолда амалга ошириш, 1 026 та ҳолатда 12,7 млрд сўмлик электрон/миллий дўкон, ауцион савдолари тартибини бузиш, 2 та ҳолатда 1,77 млрд. сўмлик қонунга зид равишда тўғридан-тўғри шартномалар тузилганлиги, 75 та ҳолатда 18,5 млрд. сўмлик харидларда Рақобат тўғрисидаги қонун талаблари бузилганлиги, 35 та ҳолатда 5,1 млрд. сўмлик бошқа хато ва камчиликлардан иборат.
Шунингдек, ўтказилган масофавий мониторинглар якунига кўра, 294,4 млрд сўмлик эълон қилинган харидлар бўйича коррупсиявий ҳуқуқбузарликларнинг сабаб ва шарт-шароитларини бартараф қилишга қаратилган 46 та тақдимнома ҳамда жиноят иши қўзғатиш масаласини ҳал қилиш учун ҳуқуқни муҳофаза қилувчи органларга 40 га яқин сўровнома киритилган бўлиб, натижаси бўйича 4 та жиноят ишлари ва 8 та маъмурий ишлар қўзғатилиши таъминланди, 8 та ҳолатда масъул ходимларга нисбатан интизомий жазо чоралари қўлланилган.
Ҳозирги кунда 117 та давлат ташкилотлари, шу жумладан банкларда 907 нафар штат бирлигидан иборат коррупсияга қарши ички назорат тузилмалари фаолияти йўлга қўйилган. Агентлик томонидан жорий йилнинг ўтган даврида 78 та вазирлик ва идораларда ички назорат тизими фаолиятининг йўлга қўйилганлик ҳолати жойига чиққан ҳолда ўрганилди. Ўрганиш натижаларига кўра, вазирлик ва идораларга ушбу йўналишдаги фаолиятни самарали ташкил этилиши юзасидан 18 та тақдимнома киритилган.
Ички назорат тузилмалари томонидан жорий йилнинг 1 ярмида 151,7 млрд сўмлик молиявий хато ва камчиликлар аниқланиб, тўпланган ҳужжатлар ҳуқуқни муҳофаза қилувчи органларга юборилган.
