Латвия Россиядан газ сотиб олишни тиклади
Ёқилғи учун еврода ҳақ тўланмоқда.
Латвиянинг газ транспорти бўйича асосий оператор бўлган Latvijas gaze воситачилар орқали Россиядан газ сотиб олишни қайта тиклади. Бу ҳақда компания раҳбари Айгарс Калвитис Delfi агентлигига маълум қилди.
У айнан қайси компания “Газпром” билан савдода воситачилик қилаётганини очиқламаган ва буни “савдо сири” деб атаган. Ёқилғи учун еврода ҳақ тўланаётгани айтилган.
Delfi маълумотларига кўра, Россиядан газ сотиб олиш июнь ўрталаридан бошлаб кўпайган. Латвия 2021 йилда 90 фоиз “зангори олов”ни Москвадан харид қилган. Аммо Украина можароси бошлангач, 2023 йилдан газ импортини тўхтатишга қарор қилинди.
Аввалроқ Германиянинг рус углеводородларига қарамлиги туфайли Европадаги етакчилигига путур етгани тўғрисида хабар берилганди.
