Андижон ҳокимини ҳакоратлаган эркак 2 йилга қамалди
У, шунингдек, Ўзбекистон Президентини ТикTок орқали ҳақорат қилган.
Андижонда ТикTок ижтимоий тармоғи орқали Ўзбекистон Президенти ва вилоят ҳокимни ҳақоратлаган 41 ёшли эркак 2 йил-у 2 ойга озодликдан маҳрум қилинди.
Вилоят суди раиси Талъатжон Мелибоев маълум қилишича, воқеа юзасидан ижтимоий тармоқларда тарқалган хабар тўлиқ эмас.
“Ишнинг ярми ҳақида хабар бериб, ярми ҳақида хабар бермаслик одамларни бошқа томонга бошлаб кетади. [Ижтимоий тармоқларда] фақат 140-модда билан, вилоят ҳокимини ҳақорат қилгани учун қамаб қўйилди дейиляпти, қолгани йўқ. Ўртоқлар, инсоф бўлиши керак-да энди. Ишнинг 158-моддаси ҳам бор”, – деган суд раиси 30 июль кунги матбуот анжуманида.
Шунингдек, судья музкур ҳукм 7 июль куни чиққани, лекин ҳали қонуний кучга кирмаганини маълум қилган.
Эслатиб ўтамиз, Жиноят кодексининг 158-моддаси 3-қисми Ўзбекистон Президентини омма олдида ҳақоратлаш ёки унга туҳмат қилишни назарда тутади. Бунинг учун 3 йилгача ахлоқ тузатиш ишлари ёки 2 йилдан 5 йилгача озодликни чеклаш ёхуд 5 йилгача озодликдан маҳрум қилиш жазоси белгиланган.
