Жиззахда кучли ёғингарчилик сабаб ариқ сувлари ўзанидан тошиб кетди
Ҳозирда вазият ФВБ ходимлари томонидан назоратга олинган.
Бугун, 30 июл куни Жиззах вилоятининг Фориш туманида сув тошқинлари кузатилди. Ҳолат юзасидан вилоят Фавқулодда вазиятлар бошқармаси расмий муносабат билдирди.
Қайд этилишича, соат 16:15 ларда Фориш тумани Учма қишлоғида кузатилган қисқа муддатли ёғингарчилик оқибатида ариқ сувлари кескин кўпайиб, айрим жойларида ўзанидан тошиб чиққан.
Ҳодиса ярим соатга яқин давом этиб, аҳоли яшаш жойлари ва экин майдонларига жиддий талафот етмаган. Жабрланганлар йўқ. Жиззах вилояти Фавқулодда вазиятлар бошқармасига сел ва тошқинлар бўйича фуқаролардан мурожаатлар келиб тушмаган.
Айни вақтда ҳодиса жойида ФВБ ходимлари томонидан қўшимча ўрганиш ишлари олиб борилмоқда. Вазият назорат остида.
