“Иш битгач, сиз мени танимайсиз, мен эса сизни”

 

Жиноят ишлари бўйича Нуробод туман судида навбатдаги иш кўриб чиқилиб, Давлат кадастрлар палатаси туман филиалининг икки нафар ходимига нисбатан суд ҳукми ўқилди.

 

Маълум бўлишича, филиалнинг “Кадастр йиғма жилдларини тайёрлаш бўлими” кадастр муҳандиси лавозимида ишлаб келаётган 31 ёшли ходим жорий йилнинг апрель ойида 30 ёшли ҳамкасби билан жиноий тил бириктиради. Улар фуқародан чорвачиликда фойдаланиш учун мўлжалланган ерда бино мавжуд деб ҳужжат расмийлаштириб бериш эвазига 20 млн пора талаб қилган.

 

Нуробод туманида яшовчи онахон туман кадастр филиалига келиб, 1 гектар ернинг ҳужжатларини расмийлаштириш учун мурожаат қилган. Ходимлар аёл ерни сотмоқчи бўлганини билгач, харидорнинг ўзи боғланиши учун қўл телефонини бериб юборади. Улар ерга харидор бўлган йигитга “Ерни 6 сотиҳига ҳеч қандай бино иншоотлар бўлмаса-да, мен сизга бино бор, деб кадастр ҳужжатларни расмийлаштириб бераман, фақат гап орамизда қолсин, харажати 20 млн сўм бўлади, иш битгач, сиз мени танимайсиз, мен эса сизни” дейди. 

 

Раҳбари орқали бўш майдонда бино борлиги ҳақида ҳужжат расмийлаштириб бермоқчи бўлган икки ходим тезкор тадбирда пора билан қўлган олинган. 

 

Судланувчилар Ўзбекистон Республикаси ЖКнинг 25,168-моддаси 2-қисми “б” бандида назарда тутилган жиноятни содир қилганликда айбли деб топилиб, ҳар иккиси Давлат кадастрлар палатаси тизимида мансабдорлик ҳамда моддий жавобгарлик ишларида ишлаш ҳуқуқидан маҳрум қилинган. Шунингдек, уларнинг ойлик иш ҳақидан 15  фоизини давлат ҳисобига ушлаб қолиш шарти билан 2 йил муддатга ахлоқ тузатиш ишлари жазоси тайинланган.

 

Муаллиф: Фарида Эшонқулова