Украиналикларга текин ош тарқатиб келган ўзбекистонлик фуқаро ракета зарбасига учради
У Андижон вилоятининг Асака туманидан бўлган.
Украинанинг Чугуев шаҳрида маҳаллий аҳолига текин палов тарқатиб келган 36 ёшли ўзбекистонлик Сардор Ҳакимов ракета зарбаси оқибатида ҳалок бўлди. Бу ҳақда “Current time” нашри хабар берди.
Қайд этилишича, Сардор Ҳакимов отишма пайтида ертўлада палов тайёрлашга тайёргарлик кўраётган бўлган.
Маҳаллий ОАВга кўра, асли андижонлик бўлган Ҳакимов 2000-йилдан буён Украинада истиқомат қилади. Урушдан кейин, 2014 йилда у Чугуевга кўчиб ўтган ва у ерда ўзбек ошхонаси ҳамда зираворлар дўконини очган.
Россиянинг Украинага босқинидан кейин Ҳакимов оиласини Ўзбекистонга юбориб, ўзи Чугуевда қолган ва одамларга ёрдам бериб келган.
25 июль куни рус қўшини у яшаётган Чугуев шаҳрига 12 та ракета зарбаси берган. Ракеталардан бири Сардор ва унинг гуруҳидаги кўнгиллилар яширинган Маданият марказини вайрон қилган. Ҳужум оқибатида Сардор ва яна икки кўнгилли ҳалок бўлган.
