Ливан ва Исроил август охирида чегара келишувига эришиш мумкин
Томонлар йирик газ кони ҳудудига даъво қилмоқда.
Ливан ва Исроил чегара масаласида август охирида келишувга эришиши мумкин. Бу ҳақда АҚШ давлат департаментининг глобал энергетика масалалари бўйича катта маслаҳатчиси Эймос Хокстин маълум қилди.
Икки давлат денгиз ҳудудидаги 856 квадрат километр майдонга даъво қилмоқда. У Ливаннинг Кана ва Исроилнинг Кариш газ конлари туташувида жойлашган. Улар ўртасидаги денгиз чегараси ҳамон белгиланмаган.
Хокстин ушбу масала юзасидан воситачи ролини ўйнамоқда.
“Икки томоннинг конструктив кайфияти чегара масаласининг тезда ҳал этилишига умид беради”, – деган дипломат.
У якшанба куни Байрутда Ливан энергетика ва сув ресурслари вазири в.б. Валид Файяд билан музокара ўтказган. Хокстин ўзи билан Исроилнинг ливанликлар таклифига жавоб олиб келганини айтган.
Бундан ташқари, АҚШ вакили бугун Ливан олий раҳбарияти билан музокаралар ўтказади.
Аввалроқ АҚШ ва Исроил Эронга қарши декларация имзолагани тўғрисида хабар берилганди.
