Тошкентда Матиз ҳайдовчиси икки пиёданиуриб юборди
Оқибатда 5 ёшли бола шифохонада вафот этган.
Тошкент шаҳрининг Олмазор туманида 30 июль куни Матиз ҳайдовчиси йўлни кесиб ўтаётган 2 нафар пиёдани уриб юборди. Ҳолат юзасидан шаҳар ИИББ ЙҲХБ ахборот хизмати маълумот берди.
Қайд этилишича, ўша куни соат 15:30 ларда 2001 йилда туғилган ҳайдовчи А. Ш. ўзининг бошқарувидаги Матиз (давлат рақами 70 L 839 FA) русумли автоуловда Олмазор тумани Фаробий кўчаси бўйлаб ҳаракатланаётганда йўлнинг қарама-қарши қисмига чиқиб кетган. Шундан сўнг 14-сонли оилавий поликлиника қаршисида йўлни кесиб ўтаётган 1988 йилда туғилган пиёда Т. Н. ва вояга етмаган 2017 йилда туғилган Х. М.ни уриб юборган.
ЙТҲ оқибатида пиёда Т. Н. ва Х. М.лар Республика шошилинч тез тиббий ёрдам илмий маркази шифохонасига ётқазилган, бироқ шифокорларнинг уринишларига қарамай, вояга етмаган Х. М. шифохонада вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилган. А. Ш.га нисбатан қамоққа олиш эҳтиёт чораси танланган. Тергов ҳаракатлари давом этмоқда.
