Украина ойига қанча дон экспорт қила олади?
Кечадан бошлаб ғалла олиб чиқилиши қайта тикланди.
Украина ойига 3 миллион тонна ғалла экспорт қилиши мумкин. Бу ҳақда мамлакат инфратузилма вазири Александр Кубраков маълум қилди.
Унинг сўзларига кўра, икки ҳафта давомида портлар орқали синов тариқасида кунига учтадан дон ортилган кема йўлга чиқади. Агар йўналишлар хавфсизлиги таъминланса, 4-6 ҳафта давомида экспорт ҳажми ойига 3 миллион тоннагача етади.
“Биз йўналишлар хавфсизлигини кўришимиз лозим, шундагина кемалар сонини кўпайтирамиз”, – деган вазир Bloomberg агентлиги билан суҳбатда.
Маълумот ўрнида: 22 июль куни Россия, Украина, Туркия ва БМТ ғалла экспортини тиклаш бўйича тўрт томонлама келишувга эришди. Истанбулда унинг амалга оширилиши юзасидан координацион марказ тузилди. 1 август куни ғалла ортилган илк кема Одесса портидан йўлга чиқди.
