Шрёдер: Кремль Украина билан музокараларга тайёр

 

Германия собиқ канцлери Герхард Шрёдернинг сўзларига кўра, Россия Украина можаросини музокаралар столида якунламоқчи. Бу ҳақда сиёсатчи Stern нашрига берган интервьюсида айтган.

 

“Ижобий томони шундаки, Кремль муаммони музокаралар ёрдамида ҳал қилмоқчи. Икки давлат низоси якуни бўйича келишув йўналиши бор эди. Масалан, Истанбулдаги март ойидаги келишувини бунга мисол қилиб келтириш мумкин”, – деган собиқ канцлер.

 

У Туркиянинг Россия-Украина можаросини ҳал қилишдаги воситачилик ролини мақтаган. Шрёдернинг сўзларига кўра, украин ғалласини олиб чиқиш бўйича келишув яхши сигнал ҳисобланади.

 

“Балки, босқичма-босқич ўт очишни тўхтатиш режимигача бўлган келишувга эришиш мумкин”, – деб қўшимча қилган у.

 

Шрёдер 1998-2005 йилларда Германия канцлери бўлган. У Россия билан анъанавий дўстлик алоқалари тарафдори бўлган. Собиқ канцлер Путин билан дўстона алоқаларга эга. Сиёсатдан кетганидан сўнг қатор рус нефть-газ компанияларида раҳбарлик лавозимларида фаолият юритган.

 

Аввалроқ Шрёдер Путин билан шахсий муносабатлардан воз кечмаслигини маълум қилганди.