Андижонда “перевод” учун пора олган шахс ушланди
У иккита талабанинг ўқишини Тошкентга кўчириб бермоқчи бўлган.
Избоскан туманида фуқароларнинг ўқишини кўчириб беришни ваъда қилган фирибгар ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, Департамент ҳамда ДХХнинг Избоскан тумани бўлимлари томонидан тезкор тадбир ўтказилган. Унда фуқаро Г. Э. бошқа фуқаролар М. ва Т.нинг қўшни Қирғизистон Республикаси Олий таълим муассасасидаги ўқишларини танишлари ёрдамида Тошкент менежмент ва иқтисодиёт профессионал профиль институтига кўчириб беришни 3600 АҚШ долларига келишиб, олдиндан 900 АҚШ долларини олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
