Жиззахда Кобальт ҳайдовчиси ака-сингилни уриб юборди
Оқибатда 8 ёшли бола воқеа жойида ҳалок бўлган.
Жиззах вилоятининг Ғаллаорол туманида Кобальт ҳайдовчиси икки пиёдани уриб юборди. Бу ҳақда вилоят ИИБ ахборот хизмати хабар берди.
Ҳодиса 3 август куни соат 12:00 ларда Ғаллаорол тумани “Кўкбулоқ” ҚФЙ ҳудудидан ўтувчи Ғаллаорол—Қўйтош 4К-237 автомобиль йўлининг 10-километрида содир бўлган. “Бахт” МФЙда яшовчи 36 ёшли фуқаро Кобальтни бошқариб бораётиб, йўлнинг ўн тарафида велосипедда кетаётган 8 ёшли бола ва унинг 4 ёшли синглисини уриб юборган.
ЙТҲ оқибатида бола тан жароҳати олиб, воқеа жойида вафот этган. Синглиси “чап чаноқ ёпиқ синиши, қорин бўшлиғи шикасти” ташхиси билан туман тиббиёт бирлашмасининг жонлантириш бўлимига ётқизилган.
Ҳозирда ҳолат юзасидан жиноят иши қўзғатилган.
