Россия бугундан Европага кўмир экспорт қила олмайди
Чекловлар санкцияларнинг бешинчи пакети доирасида қабул қилинганди.
10 августдан Буюк Британия ва Европа Иттифоқи Россиядан кўмир сотиб олишни тўхтатди. Бу ҳақда “ТАСС” хабар берди.
Лондон ва Брюссель бундан кўзланган мақсад Россия иқтисодиётига зарар етказиш эканини таъкидлаган. Шу билан бирга Бирлашган Қироллик бу чекловнинг оқибатларига қарши жиддий чораларни амалга оширган.Британия рус кўмирига қаттиқ боғланиб қолганлиги қайд этилган. Хусусан, 2021 йилда мамлакатда фойдаланиладиган кўмирнинг 48 фоизи импорт қилинган, унинг қарийб ярми Москва улушига тўғри келган.
Бундан ташқари, Россия Евроиттифоқнинг йирик импортёрларидан саналади. Ўтган йили ЕИга 48.7 миллион тонна кўмир сотилган (Россия экспортининг 21.8 фоизи).
РФ кўмирига эмбарго ЕИнинг бешинчи санкциялар пакети доирасида қабул қилинган эди.
Аввалроқ Венгрия Москвага қарши санкция жорий этишни тўхтатишга чақирганди.
