Самарқандда иккита Дамас ўзаро тўқнашиб кетди
Оқибатда бир нафар йўловчи вафот этган.
Жорий йилнинг 3 август куни Самарқанд вилоятининг Тойлоқ туманида 2 та Дамас иштирокида йўл-транспорт ҳодисаси содир бўлди. Бу ҳақда вилоят ИИБ ахборот хизмати хабар қилди.
Маълум бўлишича, автоҳалокат ўша куни соат 20:00 атрофида Тойлоқ тумани ҳудудидан ўтувчи А-377 автомобиль йўлининг 9-километрида юз берган. Мазкур йўлда ҳаракатланиб келаётган Дамас ҳайдовчиси автомашина бошқарувини йўқотиб, қарама-қарши йўналишдаги Дамаснинг олд тарафига бориб урилган.
Ҳодиса оқибатида иккала ҳайдовчи ва бир нафар йўловчи туман тиббиёт бирлашмасига мурожаат қилган. Кўрсатилган муолажаларга қарамасдан, йўловчи шифохонада вафот этган.
Эслатиб ўтамиз, бундан олдин Самарқанд вилоятининг Пастдарғом туманида Ласетти ва Ваз-21063 русумли автомашиналар тўқнашуви оқибатида бир нафар йўловчи воқеа жойида ҳалок бўлганди.
Жавоҳирбек ТУРСУНОВ
