Москва Украинанинг қанча бойлигини ўзлаштиргани маълум бўлди

 

Россия Украинада умумий 12.4 триллион долларлик ресурслари бўлган конларни назоратга олди. Бу ҳақда The Washington Post (WP)хабар берди.

 

Газета Канаданинг SecDev компанияси маълумотларига асосланган. Унга кўра, ушбу конларнинг бир қисми 2014 йил Қрим аннексияси давридаёқ эгалланган. Хусусан, ёқилғи, металл ва фойдали қазилмаларнинг умумий қиймати 12.4 триллион долларга тенг. Хусусан, Украина 63 фоиз кўмир ҳавзаларини, 11 фоиз нефть, 20 фоиз газ, 42 фоиз металл ва 33 фоиз нодир рудалар конларини йўқотган.

 

SecDev Россия армияси 41 та кўмир, 27 газ, 14 та пропан, 9 та нефть, олтита темир, 2 та титан рудаси, 2 та цирконий конларини мусодара қилганини таъкидлаган.

 

WP Украина ўз конларининг 2/3 қисмининг устидан назоратни бутунлай йўқотиши мумкинлигини ёзган. Бу Ғарбий Европанинг Хитой ва Россия импортига муқобил топишини қийинлаштиради.

 

Аввалроқ Владимир Зеленский Украинада мусодара қилинган Россия мулклари тўғрисида маълумот берганди.