АҚШ Конгресси Байденнинг 430 миллиардлик ташаббусини қўллаб-қувватлади
Бу маблағлар соғлиқни сақлаш, иқлим ва солиқ тизимларига йўналтирилади.
АҚШ конгресси вакиллар палатаси Жозеф Байденнинг инфляция таъсирини камайтиришга қаратилган ташаббусини қўллаб-қувватлади. Бу ҳақда Reuters хабар берди.
Қонун лойиҳасини 220 конгрессмен маъқуллаган, 207 нафари қарши чиққан. Ўтган ҳафтада уни Сенат ҳам тасдиқлаганди. Оқ уй ушбу ҳужжатни “Инфляцияни пасайтириш тўғрисидаги қонун” деб атаган. У 430 миллиард доллар ажратишни кўзда тутади.
Маблағлар соғлиқни сақлаш, иқлим ва солиқ тизими учун сарфланади. Хусусан, тоза энергетика ва иқлим мақсадларига эришиш учун 370 миллион доллар, дори-дармон ва тиббиёт суғурталарини арзонлаштириш мақсадида 64 миллиард доллар ажратилади.
Бу харажатларни солиқ ислоҳоти орқали қоплаш мақсад қилинган. Бу орқали бюджет дефицитини 300 миллиард долларга қисқартириш мумкин.
Аввалроқ АҚШ ҳарбий бюджети рекорд даражада оширилиши тўғрисида хабар берилганди.
