Экоқўмита раиси бир вақтнинг ўзида 6 та машинадан фойдаланадими?

 

Ижтимоий тармоқда Экология ва атроф-муҳитни муҳофаза қилиш давлат қўмитаси раиси бир вақтнинг ўзида 5-6 та хизмат машинасидан фойдаланиши ҳақида маълумотлар тарқалди. Мазкур хабарлар юзасидан қўмита матбуот хизмати расмий муносабат билдирди.

 

Қайд этилишича, қўмита раҳбарияти хизмат автомашиналаридан қонунчилик ҳужжатларида белгиланган тартиб-қоидаларга асосан фойдаланиб келмоқда. Қўмита раисига 1 та “Мерседес” автотранспорт воситаси бириктирилган. Шунингдек, зарур ҳолларда хизмат вазифасини ўташ давомида олис ва чекка ҳудудларга хизмат сафари вақтида ёнилғи харажатларини тежаш мақсадида техник кўмак маблағлари ҳисобидан харид қилинган навбатчи электромобиль ишлатилиши мумкин.

 

Жорий йилнинг ўтган даврида Қўмитанинг барча ҳудудий бўлинмалари, шу жумладан, Қорақалпоғистон Республикаси, Бухоро ва Навоий вилоятларининг олис ва чекка ҳудудларида жойлашган муҳофаза этиладиган табиий ҳудудларнинг моддий-техник базасини яхшилаш мақсадида 40 дан ортиқ автотранспорт воситалари (“Нива”, электромобиль, “Дамас”) хорижий ҳамкорларнинг техник кўмак маблағлари ҳисобидан харид қилинган. Таъкидланишича, ушбу автотранспорт воситалари хариди учун бюджет маблағлари умуман сарф қилинмаган.

 

“Давлат экология қўмитаси шахснинг қадр-қиммати камситилишига ёки унинг обрўсизлантирилишига олиб келадиган ёлғон, асосланмаган ахборотни тарқатганлик учун Ўзбекистон Республикаси қонунчилигида тегишли жавобгарлик нормалари белгиланганлигини эслатиб ўтамиз”, — дейилади хабарда.