Тошкент метроси поездида чироқ ўчиб қолди
Шундан сўнг йўловчилар бекатда туширилган.
Бугун, 16 август куни Тошкент метросининг “Ўзбекистон” йўналишида ҳаракатланаётган поезд вагонида чироқ ўчиб қолди.
Метрополитеннинг маълум қилишича, соат 17:33 лар атрофида “Чорсу” бекатидан “Тинчлик” бекатига ҳаракатланаётган 33-сонли ҳаракат таркибининг вагонларини ёруғлик чироқлари билан таъминлаш тизимида қисқа муддатли носозлик юзага келган.
Машинист эса белгиланган йўриқномага асосан, ҳаракат тезлигини пасайтириб, “Тинчлик” бекатига кириб келган ва йўловчиларни шу ерда қолдирган. 2 дақиқадан сўнг келган 31-сонли ҳаракат таркиби бекатдаги барча йўловчиларни “Беруний” бекатигача олиб борган.
“Ҳозирда барча поездлар белгиланган жадвал асосида ҳаракатланмоқда. Келтирилган ноқулайлик учун барча йўловчилардан узр сўраймиз”, — дейилади хабарда.
