АҚШ давлат департаменти Конгрессни Россия масаласида огоҳлантирди
Аввалроқ Вашингтон Москвани “терроризм ҳомийси” деб эълон қилиши мумкинлиги маълум бўлганди.
Россиянинг АҚШ томонидан терроризм ҳомийси давлати деб тан олиниши бир қатор муаммоларга сабаб бўлади. Давлат департаменти бу ҳақда Конгрессни огоҳлантирган.
Politico газетасининг манбаларининг сўзларига кўра, ушбу қадам Украина ғалласининг экспорт қилиниши бўйича келишувнинг бузилишига олиб келиши мумкин. Давлат департаменти Москванинг ўз мажбуриятларини бажариш бўйича ҳеч қандай кафолат йўқлигини таъкидлаган.
Бундан ташқари, терроризм ҳомийси деб эълон қилинган тақдирда, Россияга қарши янги санкциялар жорий этилади. Бу АҚШ компанияларининг РФ бозорида келишувлар имзолашини ва иқтисодий иштирокини чеклайди. Хусусан, бу ядро материаллари бўйича ҳамкорликнинг тўхташига олиб келади.
Ҳозирда Конгресс Сурия, Эрон, КХДР ва Кубани терроризм ҳомийси деб эълон қилган. Вакиллар палатаси спикери Нэнси Пэлоси Россияни ҳам ушбу рўйхатга қўшиш ташаббусини илгари сурган.
АҚШ сенати бу таклифни қўллаб-қувватлаган. Конгресс бу бўйича қонун лойиҳасини ишлаб чиққан. Россия ТИВ агар ушбу қадам ташланса, икки давлат ўртасидаги муносабатлар тўлиқ узилишидан огоҳлантирган.
