Андижонда яна бир тадбиркор ўзини осиб қўйди

 

Ижтимоий тармоқда андижонлик тадбиркор Жалақудуқ туманида ўзи қураётган мактабнинг спорт залида осиб қўйгани ҳақида хабар тарқалди. Ҳодисага тадбиркор пулларини ололмагани сабаб бўлгани айтилмоқда. 

 

Расмий хабарга кўра, 20 август куни Улуғнор тумани “Бобур” МФЙ Фурқат кўчасида яшаган фуқаро В.А Жалақудуқ туманидаги 29-сонли мактаб спорт залида ўзини осиб, ўз жонига қасд қилган. 

 

Марҳумнинг танаси суд-тиббий экспертизаси бюроси экспертлари иштирокида кўздан кечирилганида, унинг баданида бўйнидаги осилишдан қолган странгуляцион эгат кўринишидаги излардан ташқари бирон-бир тан жароҳатлар аниқланмаган.

 

Ҳолат юзасидан вилоят ҳокимлиги томонидан ўрганиш ишлари олиб борилган. Аниқланишича, тадбиркорга ҳеч ким, на прокурор, на ҳоким тазйиқ ўтказмаган.

 

“Тадбиркорга қурилиши олиб борилаётган лойиҳа қийматининг 85 фоизи миқдорида маблағ ажратилган”, — дейилади вилоят ҳокимлиги хабарида.

 

Ҳозирда марҳумнинг ўз жонига қасд қилганлиги сабабларини аниқлаш юзасидан Жалақудуқ туман прокуратураси томонидан терговга қадар текширув ҳаракатлари ўтказилмоқда.Текширув ҳаракатлари вилоят прокуратураси томонидан назоратга олинган.

 

Эслатиб ўтамиз, бундан олдин Андижон вилоятининг Шаҳрихон туманида 45 ёшли тадбиркор ўзига тегишли мевали боғда жонига қасд қилиб, вафот этганди. Ушбу воқеадан икки кун кейин унинг отаси ҳам оламдан ўтган.