БАА-Эрон муносабатлари илиқлашмоқда
Абу-Даби Теҳронга элчисини қайтаради.
БАА Эронга ўз элчисини қайтаради. Бу ҳақда мамлакат ТИВ маълум қилди.
"Элчининг қайтиши тўғрисидаги қарор Эрон ТИВ билан мувофиқлаштирилди", — дейилади вазирлик баёнотида.
Абу-Даби Теҳрондан ўз элчисини 2016 йилда чақириб олган. Бунга Эрондаги Саудия Арабистони элчихонасига уюштирилган ҳужум сабаб бўлган. Бундан ташқари, икки давлат Форс кўрфазидаги уч оролга даъво қилиб келади.
Муносабатлар илиқлашиши ўтган йилдан бошланган. 2021 йил 6 декабрь куни БАА миллий хавфсизлик бўйича давлат маслаҳатчиси шайх Тахнун бин Зайд ал Наҳаён Теҳронда президент Иброҳим Раисий билан музокара ўтказган. Унда томонлар ўзаро ҳамкорликни кенгайтиришга келишиб олган.
Аввалроқ Эрон Россия билан нефть-газ соҳасида 40 миллиард долларлик келишувга эришганди.
