FT: Африкада озиқ-овқат инқирози хавфи бор
Россиядан ўғитлар экспорти чекланиши бунга сабаб бўлиши мумкин.
Россиядан минерал ўғитларнинг етказиб берилишининг камайиши Африка давлатларида йирик озиқ-овқат инқирозига сабаб бўлиши мумкин. Бу ҳақда Financial Times маълум қилди.
Нашрнинг қайд этишича, Ғарб санкциялари РФнинг ўғит экспорт қилишининг чекланишига олиб келди. Москванинг бу маҳсулотларнинг глобал бозордаги улуши 15 фоизни ташкил этади.
Россия банкларининг SWIFT халқаро тўлов тизимидан узиб қўйилиши Африка давлатларининг минерал ўғитларни сотиб олишини қийинлаштирган. Financial Times’нинг Gro Intelligence таҳлилий марказига таяниб маълумот беришича, қитъага бу турдаги маҳсулотларнинг етказиб берилишининг оз миқдорда пасайиши ҳам ҳосилдорликнинг кескин камайишига олиб келади. Бу қурғоқчилик билан қўшилиб озиқ-овқат етишмовчилиги инқирозини янада кучайтиради. Нидерландиянинг IDH маркази Саҳройи Кабирдан жанубдаги давлатларда бу ҳолат ҳозирнинг ўзида кузатилаётганини таъкидлаган.
McKinsey консалтинг компанияси бу инқирознинг оқибатлари 2007-2008 йилги молиявий инқироздан ҳам оғир бўлишини тахмин қилган. бундан ташқари, халқ ғалаёнлари кучайиши эҳтимоли ҳам юқори экани қайд этилган.
Аввалроқ БМТ дунё мамлакатларини оммавий очлик хавфидан огоҳлантирганди.
