Маккада “Масжид хизматчилари – инсоният элчилари” дастури ишга тушди
Дастур БМТнинг “Бутунжаҳон гуманитар ёрдам куни” муносабати билан ишлаб чиқилди.
Саудия Арабистони Икки муқаддас масжид ишлари бўйича Бош бошқармаси БМТнинг “Бутунжаҳон гуманитар ёрдам куни” муносабати билан “Масжид хизматчилари – инсоният элчилари” дастурини ишга туширди, дея хабар беради islam.ru Саудия матбуот агентлигига таяниб.
Дастур Макка ва Мадина шаҳарларидаги икки муқаддас масжид ва бошқа жойларда кексалар ва имконияти чекланган инсонларга ўз ибодатларини бажаришда ёрдам бераётган кўнгиллиларни эъзозлашга қаратилган.
Одатда, бундай кўнгилли инсонлар зиёратчилар учун ногиронлик аравачаларини бепул етказиб беришади ва ҳар душанба ҳамда пайшанба кунлари ифторлик тарқатишда иштирок этадилар.
"Саудия Aрабистони бутун дунё бўйлаб муҳтожларга ёрдам бериш учун ўз ҳаётини хавф остига қўйган ишчилар ва кўнгиллиларга ҳурмат бажо келтириш учун “Жаҳон гуманитар ёрдам куни"ни нишонламоқда",- дейди бошқарманинг ижтимоий, кўнгиллилар ва гуманитар масалалар бўйича вакили Шайх Холид бин Фаҳад Aл Шалавий.
Шунингдек, у мазкур хайрли иш ёшларнинг огоҳлигини ошириб, ёрдам ишларига жалб қилишга ундашини қайд этган.
