Дунёдаги энг чуқур ғор Ўзбекистондами?

 

Айни пайтда Бойсун туманидаги Бойбулоқ, Вишневский, Хўжа Ғур-Ғур ота ғорлари россиялик махсус экспедиция томонидан ўрганилмоқда. Бу ҳақда Ахборот ва оммавий коммуникациялар агентлиги Сурхондарё вилояти ҳудудий бошқармаси хабар берди.

 

Қайд этилишича, ғоршунослар Чўлбайир тоғ тизмасидаги Бойбулоқ ва Вишневский ғорларини тадқиқ этиб, бу икки ғорнинг туташган қисмини излаб топишмоқчи.

 

Бойбулоқ ғори туман марказидан 65 км узоқликда жойлаган. Тоғли ҳудуддаги Деҳиболо қишлоғидан оғир тоғ йўли орқали 6-7 соатда етиб борилади.

 

Экспедиция раҳбари Вадим Логиновнинг қайд этишича, Бойбулоқ ва Вишневский ғорлари туташган бўлиши мумкин. Орадаги масофа атиги 70 метр чамаси. Бойбулоқ ғорининг аниқланган ғор йўллари 8 км.ни, чуқурлиги эса 1238 метрни Вишневский ғорининг аниқланган ғор йўллари 14 км.ни, чуқурлиги эса 1 430 метрни ташкил этмоқда.

 

Маълумот ўрнида: ҳозирда дунёда Грузиядаги Крубера ғори энг чуқур ғор ҳисобланади. Унинг чуқурлиги 2 196 метрни ташкил этади. Агар ғоршуносларнинг тахминлари ҳақиқат бўлиб чиқса, Бойсундаги "Қоронғи юлдуз" дея номланган ушбу ғор дунёдаги энг чуқури бўлиши мумкин.