Горбачёв ўлимига дунё етакчилари қандай муносабат билдирди?
Собиқ Иттифоқнинг сўнгги раҳбари 92 ёшида вафот этди.
СССРнинг собиқ президенти Михаил Горбачёв 92 ёшида вафот этди. Москва марказий клиник шифохонаси маълумотига кўра, у узоқ давом этган оғир касалликдан азият чеккан.
Россия ОАВлари сиёсатчининг пандемия бошидан буён ушбу шифохона врачлари назоратида бўлганини ёзган. Умрининг сўнгги йилини ҳам у касалхонада ўтказди.
Михаил Сергеевич Горбачев КПССнинг сўнгги бош котиби, шунингдек, Собиқ Иттифоқнинг биринчи ва охирги президенти эди.
Бундан ташқари, у Нобель мукофоти совриндори, Россия ва дунё тарихи бўйича тадқиқот ўтказадиган “Горбачёв-фонд” асосчиси эди.
Фонд берган маълумотларга кўра, собиқ президент Москвадаги Новодевичье қабристонида дафн этилади. унинг қачон бўлиши ҳозирча номаълум.
Дунё етакчилари муносабати қандай бўлди?
“1990 йилда тинчлик бўйича Нобель мукофотини қўлга киритиб, у тинчликнинг турфахилликларнинг йиғиндиси эканини айтганди. У музокаралар, шаффофлик ва қуролсизлантириш йўлидан бориб ушбу муҳим тушунчани амалиётга жорий этди”, – деган БМТ бош котиби Антониу Гуттериш.
Унинг қўшимча қилишича, Горбачёв тарихни ўзгартира олган шахс ҳисобланади.
Россия президентининг матбуот котиби Дмитрий Песков Владимир Путин Горбачёв ўлимидан қайғуда эканини, унинг яқинларига телеграмма юборишини айтган.
Буюк Британия бош вазири Борис Жонсон марҳумнинг жасоратидан доимо ҳайратга тушганини таъкидлаган.
Еврокомиссия раиси Урсула фон дер Ляйнен Горбаёвни “ҳурматга сазовор ва ишончли етакчи” деб атаб, “совуқ уруш” якунланиши билан боғлиқ хизматларини алоҳида қайд этган.
“Унинг хизматларини ҳеч қачон унутмаймиз”, – деган ЕК раиси.
Франция президенти Эммануэль Макрон ҳам Горбачёвни тарихни ўзгартирган шахс сифатида баҳолаган.
Немис сиёсатчилари Собиқ Иттифоқнинг сўнгги раҳбарининг Берлин девори қулашига қўшган ҳиссасини алоҳида таъкидлаган. Бундестаг вице-президенти Катрин Гёринг-Эккард Горбачёвнинг Шарқий Европа, жумладан, Германияда тинч сиёсий инқилоблар содир бўлишидаги ўрнини қайд этган.
Австрия канцлери Карл Нехаммер унинг Шарқ ва Ғарбни яқинлашишига катта ҳисса қўшган деб ҳисоблайди.
