Бухорода кўчадаги банкоматлар ёниб кетди
Ҳодиса жойига иккита қутқарув экипажи юборилган.
Бугун, 4 сентябрь куни Бухоро шаҳрида “Tenge bank” АТБга тегишли банкоматларда ёнғин чиқди. Ҳолат юзасидан вилоят Фавқулодда вазиятлар бошқармаси ахборот хизмати расмий маълумот эълон қилди.
Қайд этилишича, соат 20:14 да Бухоро шаҳрининг “Дўстлик” МФЙ Алпомиш кўчаси йўл ёқасида жойлашган “Tenge bank” АТБ Бухоро БХМга тегишли банкоматларда ёнғин чиққанлиги тўғрисида ФВБ навбатчилик диспетчерига хабар келиб тушган.
Ёнғин оқибатида қурилманинг 24 квадрат метр майдонда том ва девор пластик қопламалари ёнган. Ҳодиса жойига 2 та қутқарув автоекипажлари жалб этилиб, соат 20:28 да ёнғин тўлиқ ўчирилган. Ёнғиндан банкоматлар қурилмасининг 20 квадрат метр майдони ва 4 дона банкоматлар тўлиқ сақлаб қолинган. Фуқароларнинг куйиш ва тан жароҳати олиш ҳолатлари қайд этилмаган.
Бирламчи маълумотларга кўра, ёнғиннинг келиб чиқишига электр симларининг қисқа туташуви сабаб бўлган. Ҳозирда моддий зарари аниқланмоқда.
