Борис Жонсон сўнгги бор Зеленскийга қўнғироқ қилди
У эртага Бош вазир лавозимидан истеъфога чиқади.
Буюк Британия бош вазири Борис Жонсон лавозимидан кетишидан олдин Украина президенти Владимир Зеленский билан телефон орқали мулоқот қилди. Бу ҳақда “Интерфакс” нашри ёзмоқда.
“Бош вазир бугун тушдан кейин Украина президенти Владимир Зеленский билан суҳбатлашди... Бош вазир Буюк Британия Украинани қўллаб-қувватлашда давом этишини қўшимча қилди”, — дейилади хабарда.
Зеленский, ўз навбатида, Жонсонга Украина ва унинг халқига бўлган ҳурмати учун миннатдорчилик билдирган.
Бугун эрталаб Лиз Трасс Консервативлар партияси етакчиси этиб сайланган эди. Трасс Жонсон билан бирга 6 сентябрь куни қиролича Елизавета II билан учрашиш учун инглиз қиролларининг Шотландия қароргоҳига боради. У ерда Жонсон расман истеъфога чиқади ва қиролича Трассни Буюк Британиянинг янги бош вазири этиб тайинлайди.
