Германия АЭСларни тўлиқ ёпмайди
Бунга энергетик инқироз сабаб бўлган.
Германия ўз АЭСларидан 2023 йилнинг апрелига қадар фойдаланади. Бу ҳақда "Интерфакс" хабар берди.
Мамлакат иқтисодиёт вазири Роберт Хабекнинг сўзларига кўра, Германияда қолган икки АЭС ҳукуматнинг уларни ёпиш тўғрисидаги режаларига қарамай, ишлашда давом этади. Станциялар тармоқдан узилади, аммо энергетика инқирози кучайиши билан яна қайта ёқилади.
Германияга асосий энергетика манбалари етказиб берувчи Россия август охирида “Шимолий оқим” қувури орқали газ етказиб беришни тўхтатиб қўйди. Бунга техник муаммолар сабаб қилиб кўрсатилган. Берлин электр ва иссиқлик нархи кескин ошиши муносабати билан фуқароларга 65 миллиард евро компенсация ажратган.
Олаф Шольц энергетик инқироз бир йил аввал бошланганини айтганди.
