Аризона ва Техас губернаторлари Вашингтонга мигрантларни жўнатмоқда
Шу муносабат билан шаҳарда фавқулодда ҳолат эълон қилинган.
Вашингтонда мигрантлар оқими туфайли фавқулодда ҳолат эълон қилинди. Улар пойтахтга Мексика билан чегарадош штатлар — Техас ва Аризона губернаторлари томонидан юборилмоқда.
Фавқулодда ҳолат режими қачонгача давом этиши очиқланмаган. Вашингтон мэри Мюриэл Боузернинг сўзларига кўра, Техас ва Аризона Оқ уйнинг эътиборини жалб қилиш учун баҳордаёқ мигрантларни жўнатишни бошлаган. Шу вақт оралиғида шаҳарга 9400 хорижлик келган. Ушбу муаммони ҳал этиш мақсадида мигрантлар масалалари бўйича бошқарма ташкил этилган.
Унинг фаолияти учун 10 миллион доллар ажратилган, Вашингтон расмийлари бу сумма учун федерал ҳукуматдан компенсация талаб қилмоқчи. Бошқарма мигрантларни вақтинчалик жойлаштириш, озиқ-овқат билан таъминлаш ва ортга суриб бўлмайдиган ҳолатларда тиббий ёрдам кўрсатиш билан шуғулланади.
Аввалроқ Багам оролларидан АҚШга келаётган мигрантлар кемаси ағдарилиб кетгани тўғрисида хабар берилганди.
