Путин Британия қироличасининг дафн маросимида иштирок этмайди
Аввалроқ у Елизавета II вафоти муносабати билан ҳамдардлик билдирганди.
Россия Президенти Владимир Путин Буюк Британия қироличаси Елизавета II дафн маросимида шахсан қатнашмайди. Бу ҳақда давлат раҳбари матбуот котиби Дмитрий Песков маълум қилди.
Матбуот анжуманида Песковдан қироличанинг дафн маросимида президентнинг шахсан иштирок этиши ёки иштирок этмаслиги ҳақида савол берилди. У бу саволга “Йўқ, бу вариант кўриб чиқилмайди”, дея жавоб берган.
Мотам тадбирларида Россия Федерацияси номидан вакил сифатида ким қатнашиши номаълум. Таъкидланишича, буни қироллик суди ёки Буюк Британия расмийлари эълон қилишлари керак. Ҳозирча бундай эълонлар берилмаган.
Бир кун аввал Кремлнинг телеграм-каналида Россия Федерацияси президенти қиролича Елизавета II вафоти муносабати билан қирол Карл III'га ҳамдардлик билдиргани хабар қилинганди.
