Чироқчида пора олмаган ИИБ ходими пул билан мукофотланди

 

 

Қашқадарё вилоятининг Чироқчи туманида фуқаро томонидан таклиф этилган порани олмаган профилактика инспектори пул мукофоти билан тақдирланди. Бу ҳақда вилоят ИИБ ахборот хизмати хабар қилди.

 

Жорий йилнинг 10 июнь куни Чироқчи туман ИИБ ЖХХ ҲПБ профилактика инспектори Нурбек Оқназаров туманнинг тоғли ҳудуди бўлган “Лангар” МФЙда хизмат олиб бораётганда Самарқанд вилоятига тегишли “Нива” русумли автомашинага дуч келади. У автомашинани тўхтатиб, ҳайдовчи билан мулоқотга киришади. Меҳмон ўзини Б.П. деб таништириб, тегишли ҳужжатлари йўқлигини айтади.

 

Автомашинада бўлган икки нафар вояга етмаган бола Чироқчи тумани Хонтепа қишлоғида яшовчи Р.М. ва А.С. эканлигини, уларни қишлоқ ҳудудида ўсадиган “Каррак” ўсимлигини йиғиш учун ёллаганини билдиради.

 

Ходим автомашинани тегишли ҳужжатларсиз бошқариш ва вояга етмаган шахсларни мажбурий меҳнатга жалб қилиш ҳолатлари бўйича ҳужжатлар расмийлаштиради.

 

Самарқанд вилояти Нуробод туманида яшовчи фуқаро Б.П. профилактика инспекторига ишни ўз фойдасига ҳал этиш эвазига пора таклиф қилади. Катта лейтенант унга бу иши жиноят эканлигини, агар ниятидан қайтмаса, қонуний чора кўрилиши ҳақида огоҳлантирса-да, фуқаро унамайди. 

 

Натижада профилактика инспектори бу ҳақда Чироқчи туман ИИБ бошлиғи номига билдирги билан мурожаат қилади. Ҳолат юзасидан ўтказилган тезкор тадбирда фуқаро Б. П. профилактика инспектори Н. Оқназаровнинг хизмат хонасида 5,5 млн сўм пулларни пора тариқасида берган вақтида далилий ашёлар билан қўлга тушган.

 

Чироқчи туман прокуратураси томонидан фуқаро Б. П.га нисбатан Ўзбекистон Республикаси Жиноят кодексининг 211-моддаси 1-қисми билан жиноят иши қўзғатилган.

 

“Ўз хизмат вазифасига виждонан ёндашиб, коррупсион ҳолатни олдини олгани ва фуқароларда ички ишлар органларига бўлган ишончни мустаҳкамлагани учун катта лейтенант Нурбек Оқназаров бошқарма раҳбарияти томонидан пул мукофоти билан тақдирланди”, — дейилади хабарда.