Тошкент аэропортида расмий такси иш бошлади
Хизмат кўрсатиш учун “Комфорт”, “Бизнес”, “Льюкс” ва “Премиум” тарифлари жорий қилинган.
Бугун, 12 сентябр куни Тошкент халқаро аэропорти ҳудудида ауцион орқали ғолиб деб топилган такси хизмати иш бошлади.
“Taxi Airport Tashkent” стикерлари туширилган катта ва кенг юкхонага эга янги бензинли автомобиллар учиб келиш зали чиқишида туради.
Йўловчилар учиб келиш залида ўрнатилган пештахта олдига келиб, манзилини айтади. Менежер тариф бўйича километрни ҳисоблаб чиқади ва тўлаш учун суммани айтади. Агар нарх йўловчига тўғри келса, у тўловни (нақд ёки банк картаси орқали) амалга оширади. Шундан сўнг манзили ва тўланган суммаси кўрсатилган квитанция билан терминалдан чиқиб, биринчи турган таксига ўтиради. Шунингдек, йўловчи тўғридан-тўғри пештахтани четлаб ўтган ҳолда биринчи турган машинага ўтириб, такси хизматларидан фойдаланиши мумкин.
Қайд этилишича, терминал олдига кириш фақат “Taxi Airport Tashkent” хизмати учун мумкин бўлади. Бошқа барча таксилар автотураргоҳлар олдидан йўловчиларни олиб кетишлари мумкин бўлади. Йўловчи ўз ҳайдовчисини тезда топиши учун узоқдан кўринадиган катта белги ўрнатилади, бу такси ва йўловчининг учрашадиган жойи эканлигини кўрсатади.
Аэропортда хизмат кўрсатиш учун компания “Комфорт”, “Бизнес”, “Льюкс” ва “Премиум” тарифларини жорий қилди. Мижозларни биринчи қаторда “Комфорт” тарифидаги автомобиллар кутади. Бошқа тарифлардаги автомобиллар иккинчи қаторда туради ёки йўловчининг илтимосига биноан хизмат кўрсатилади.
