Қозоғистон пойтахти номи ўзгариши мумкин
Пойтахтнинг номи шу кунгача 4 марта ўзгарган.
Бу ҳақда Қозоғистон президенти матбуот котиби Руслан Желдибай хабар берди.
Унинг айтишича, парламентнинг бир гуруҳ депутатлари Қозоғистон пойтахтига Остона шаҳрининг собиқ номини қайтаришни таклиф қилган. Депутатларнинг бу таклифи аҳоли билан учрашувларда, референдум жараёнида фуқароларнинг кўплаб мурожаатларига асосланган. Парламент аъзоларининг ушбу таклифи Конституциявий қонун лойиҳасига Давлат раҳбарининг розилиги билан киритилган.
Маълумот ўрнида, пойтахтнинг биринчи номи Акмолинск эди. 1961 йилда шаҳар номи Целиноград деб ўзгартирилди. 1992 йилдан 1998 йилгача шаҳар Оқмола деб аталган. Кейин 1998 йилда шаҳар Остонага айланди. Қозоғистон пойтахти номи охирги марта 2019 йилда Нур-Султонга айланди.
