Фильм зерикарли хроника бўлиб қолмаслиги керак— Люк Бессон

 

 

Бугун Тошкент халқаро кинофестивали доирасида француз кинорежиссёри ва продюсери Люк Бессон билан учрашув ўтказилди.

 
Унда режиссёр кинодаги фаолияти, янги фильмлар суратга олишда режиссёрлик маҳорати, драматургия ва актёрлар билан ишлаш борасида маълумотларни тақдим этди.

 

“Тошкент халқаро кинофестивалида иштирок этаётганимдан жуда хурсандман. Ўтган йили ҳам ташриф буюргандим ва маҳоратли ёшларни кўргандим. Бу йили уларнинг сони янада ортганига ишонаман”, — дейди у.  

 

Люк Бессон Ўзбекистон ва Тожикистон киноижодкорлари томонидан суратга олинаётган “Навоий ва Жомий” фильмини яратишда бадиий раҳбар сифатида иштирок этади. Айни пайтга қадар ижодий гуруҳ томонидан фильм сценарийси тайёрланган. 

 

“Мен тарихий мавзуда иккита фильм суратга олганман. Аммо, тан оламан, ўзбек ва тожик халқларининг бу икки йирик намояндаси ҳақида шу лойиҳа сабаб хабар топдим. Абдураҳмон Жомий ва Алишер Навоийни  нафақат буюк шоир, балки тинчлик ва  барқарорлик курашчиси сифатида кашф этдим. Тарихий бадиий фильм ҳақиқат ва бадиий тўқима оралиғида яратилади. Мувозанатни қатъий назорат қилиш лозим. Фильм  тарихий ҳақиқатдан узоқлашмаслиги, айни пайтда зерикарли  хроникага айланиб қолмаслиги керак”, — дейди режиссёр.

 

.