Фарғонада боғча болалари заҳарлангани айтилмоқда
Ҳолат юзасидан вилоят прокуратуаси маълумот берди.
Ижтимоий тармоқларда Олтиариқ туманидаги мактабгача таълим ташкилотида 41 нафар болалар заҳарлангани ҳақида хабарлар тарқалган. Ҳолат юзасидан вилоят прокуратураси расмий муносабат билдирди.
Аниқланишича, 14 сентябрь куни соат 18:00 ларда Олтиариқ тумани тиббиёт бирлашмасига тумандаги 39-сонли Давлат мактабгача таълим ташкилотида тарбияланаётган 8 нафар вояга етмаган болалар алиментар диарея (номутаносиб овқатланиш оқибатида овқат ҳазм қилиш тизимининг бузилиши) бирламчи ташҳиси билан ётқизилган. Беморларнинг умумий ҳолати қониқарли.
Шунингдек, 15 сентябрь куни 33 нафар қайд қилинган муассаса тарбияланувчиларнинг ота-оналари фарзандларини саломатлигини тиббий кўрикдан ўтказиш мақсадида тиббиёт муассасасига мурожаат қилишган.
Уларда қайд қилинган касаллик аломатлари аниқланмаган, уларнинг 20 нафари кузатув остида шифохонада қолдирилиб, 13 нафари шифохонадан чиқарилган.
Мазкур ҳолат юзасидан ҳозирда Олтиариқ тумани прокуратураси томонидан терговга қадар текширув ўтказилмоқда, экпертиза текшируви учун тегишли намуналар олиниб, суд-тиббий экспертизалари тайинланган. Текширув вилоят прокуратураси томонидан назоратга олинган.
