Чегарадаги отишма сабаб 24 нафар қирғизистонлик ҳалок бўлди
Қирғизистон томони Тожикистонни ўт очишни тўхтатиш бўйича эришилган келишувларга қатъий риоя қилишга чақирди.
Тожикистон билан чегарадаги тўқнашувларда Қирғизистон томондан 24 киши ҳалок бўлди. Бу ҳақда мамлакат соғлиқни сақлаш вазирлиги маълум қилди.
Қирғизистон Миллий хавфсизлик давлат қўмитаси чегара хизмати хабарига кўра, Тожикистон фуқаролари провокация учун ўз уйларига ўт қўйган.
“Богдари қишлоғида ўт очишни тўхтатиш вақтида Тожикистон фуқаролари ўз уйларига ўт қўйишни бошлади. Бундай ҳаракатлар қирғиз томонини уларнинг уйларини вайрон қилганликда айблаш учун атайлаб қилинган провокациядир”, — дейилади Чегара хизмати хабарида.
“Спутник” нашрининг ёзишича, “Гулистон” назорат-ўтказиш пунктида Қирғизистон ва Тожикистон чегара хизматлари раҳбарияти учрашиб, ўзаро келишувга эришган.
Унга кўра, 17 сентябрь куни соат 09:00 га қадар икки давлат чегара бошқармаларининг ҳудудий бошқармалари раҳбарлари қирғиз-тожик чегарасида провокациялар ва отишмаларнинг олдини олиш бўйича ишларни шахсан ташкил этиши лозим.
