Тошкентда ИИО ходимлари аёл кишини уйидан мажбурлаб олиб кетишди
Ҳолатга шаҳар ИИББ расмий изоҳ берди.
Ижтимоий тармоқларда ИИО ходимлари ва фуқаролар ўртасидаги можаро акс этган видео тарқалмоқда. Мазкур ҳолат юзасидан шаҳар ИИББ расмий муносабат билдирди.
Маълум қилинишича, жорий йилнинг 10 август куни Н.Б. ва З.А. Шайхонтоҳур тумани Жангоҳ мавзесида жамиятда юриш-туриш қоидаларини қасддан менсимасдан, ўзаро жанжаллашиб, жамоат тартибини бузишган.
Ҳолат юзасидан ўтказилган текширув жараёнида фуқаро Н.Б. чақирилган вақтда ички ишлар органлари ходимининг ИИБга кўрсатилган муддатда келиш тўғрисидаги қонуний талабларини бажармаган. Ҳолат юзасидан фуқароларга нисбатан Маъмурий жавобгарлик тўғрисидаги кодекснинг 183-моддаси ва 194-моддаси билан баённома расмийлаштирилган ва кўриб чиқишлик учун жиноят ишлари бўйича туман судига тақдим этилган.
Фуқаро Н.Б. бир неча маротаба суд томонидан чақиртирилган бўлишига қарамасдан сабабсиз суд мажлисига келмаганлиги сабабли уни мажбурий келтириш қарори чиқарилган.Жорий йилнинг 9 сентябрь куни фуқаро Н.Б. ИИО ходимлари томонидан мажбурий тартибда судга олиб кетилаётганлиги ҳолати видеода акс этган.
Жиноят ишлари бўйича Шайхонтоҳур тумани суди томонидан фуқаролар Н.Б. ва З.А.ларга нисбатан 3 сутка маъмурий қамоқ жазоси тайинланган. Ходимларнинг ҳаракати юзасидан прокуратура томонидан текширув ўтказилмоқда.
