“Толибон” асир олган америкалик озод этилди
Байден ўз навбатида толиблар вакилини афв қилган.
Афғонистонда 2020 йилда асирга олинган АҚШ фуқароси Марк Фрерикс озод қилинди. Бу ҳақда Жозеф Байден баёнотида сўз боради.
“Бугун биз Марк Фрерикснинг озод қилинишига эришдик ва у тез орада уйида бўлади. Бирма (Америкада Мьянма давлати ҳамон шундай аталади), Гаити, Россия Венесуэла ва бошқа жойларда асир олинган америкаликларни озод қилиш, уларнинг уйга қайтишига эришиш бизнинг асосий бурчимиздир”, – деган Байден.
Бундан олдин CNN телеканали АҚШ президенти Фрерикснинг озод этилиши учун “Толибон” ҳаракати вакилларидан бирини афв қилгани ҳақида хабар берганди. Гап толиблар асосчиси ва илк етакчиси Мулла Умарнинг яқин тарафдори Башир Нурзай ҳақида кетмоқда. У Гуантанамо базасидаги қамоқхонада сақланаётган сўнгги афғонистонлик эди.
Фрерикс АҚШ ҳарбий-денгиз флоти ветерани ҳисобланиб, 2020 йил январида Афғонистонда ўғирлаб кетилган.
