Россия Украина асирга олинган 10 нафар хорижликни озод қилди
Саудия Арабистони валиаҳд шаҳзодаси бу масалада воситачи ролини ўйнаган.
Россия Саудия Арабистони валиахд шаҳзодаси Муҳаммад бин Салмон воситачилигида Украинада қўлга олинган 10 нафар хорижликни озод қилди. Бу ҳақда Reuters агентлиги хабар берди.
Улар орасида АҚШ, Буюк Британия, Швеция, Хорватия ва Марокаш фуқаролари бор. Озод этилганлар махсус самолёт орқали Саудияга келган.
Муҳаммад бин Салмон асирлар масаласида Москва ва Киев билан тўғридан тўғри алоқада бўлган. Олиб борилган музокаралар натижасида беш нафар британиялик, бир нафар марокашлик, бир нафар швециялик, бир нафар хорват ва икки нафар америкалик озод қилинган.
Бундан ташқари, ҳозирда 50 нафар украиналик ва 200 нафар россиялик асирларни ўзаро алмашиш бўйича музокаралар олиб борилаётгани айтилган. Улар орасида Россияга яқин сиёсатчи Виктор Медведчук ҳам бўлиши мумкин.
Аввалроқ Сербия президенти Александр Вучич Россия-Украина можароси глобал низога айланиб кетиши мумкинлигидан огоҳлантирганди.
