Расман: Назарбоевга бағишланган кун энди давлат байрами эмас
Қозоғистонда биринчи президент куни байрами мақоми пасайтирилди.
Қозоғистон парламенти юқори палатаси (Сенат) Биринчи президент кунини давлат байрами мақомидан маҳрум қилди. Сенаторлар тегишли қонунга киритилган ўзгартиришларни маъқуллаган.
Бу таклиф аввалроқ мамлакат парламенти қуйи палатаси депутатлари томонидан берилганди. Депутатлар биринчи президент кунини давлат рамзлари куни, миннатдорчилик куни каби жамоавий аҳамиятга эга кун сифатида нишонлашни таклиф қилган.
Қозоғистонда биринчи президент куни 2012 йилдан буён нишонланди. У мамлакат илк раҳбари Нурсултон Назарбоевнинг хизматларига ҳурмат юзасидан жорий этилганди. Шу пайтга қадар ҳар йилнинг 1 декабрь куни барча вилоятларда тантанали тадбирлар ўтказилган ва бутун Қозоғистонда дам олиш куни эълон қилиниб келинган.
Аввалроқ Қозоғистон пойтахти номини Остона деб ўзгартириш маъқулланганди.
