Боррель: Украина дони асосан муҳтож давлатларга етказиб берилмоқда
Дипломат "ғалла келишуви" аҳамияти ҳақида гапирди.
"Ғалла келишуви" озиқ-овқат инқирозини юмшатади, аммо уни бутунлай йўқ қилмайди. Бу ҳақда Евроиттифоқ дипломатияси раҳбари Жозеп Боррель маълум қилди.
"Украина ғалласининг учдан икки қисми европаликларга эмас, унга муҳтож бўлган давлатларга кетмоқда", — деган дипломат БМТ хавфсизлик кенгашидаги чиқишида.
Шу билан бирга Боррель бу айнан қайси давлатлар эканига аниқлик киритмаган.
Маълумот ўрнида: 22 июль куни Истанбулда Украина ғалласини экспорт қилиш бўйича тўрт томонлама шартнома имзоланди. Унга кўра, Россия тўртта порт орқали дон олиб чиқилишига розилик билдирган. Озиқ-овқат маҳсулотлари ортилган илк кема 1 август куни йўлга чиқди.
Аммо сўнгги пайтларда Россия бу келишув тўлиқ бажарилмаётганини айтмоқда. Хусусан, Владимир Путин ғалланинг аксарият қисми ривожланган давлатларга олиб кетилаётганини маълум қилган. Украина ва Ғарб томони ўз навбатида буни инкор этган.
