Ғарб толибларни терроризмга қарши курашга чақирди
Бу ҳақда АҚШ ва Европа давлатлари қўшма коммюникесида сўз боради.
АҚШ ва Европа давлатлари "Толибон" ҳаракатини афғон фуқароларини террорчи гуруҳлар ҳужумидан ҳимоя қилишга чақирди. Бу АҚШ, ЕИ, Франция, Германия, Италия, Норвегия ва Буюк Британия тарқатган қўшма коммюникеда сўз боради.
15 сентябрь куни юқоридаги давлатларнинг Афғонистон бўйича махсус вакиллари Нью-Йоркда йиғилган.
"Махсус вакиллар ва элчилар "Толибон"ни этник ва диний жамоаларни ИШИД ва бошқа террорчилар ҳужумларидан ҳимоя қилишга, шунингдек, ушбу ҳаракатларни содир этганларни жавобгарликка тортиш учун барча чораларни кўришга чақиради", — дейилади ҳужжатда.
Томонлар, шунингдек, аёллар ва этник ҳамда диний озчилик гуруҳларининг ҳуқуқлари чеклаб келинаётганига эътибор қаратган. Улар толибларни хотин-қизларнинг ўрта мактабга боришига қўйилган тақиқларни олиб ташлашга чақирган.
Аввалроқ АҚШ ва "Толибон" ўртасида асирлар алмашинуви амалга оширилганди.
