Нью-Йоркда Марказий Осиё ТИВ раҳбарлари ва АҚШ давлат котиби учрашди
Ўзбекистон делегациясига Владимир Норов бошчилик қилган.
2022 йил 22 сентябрь куни Нью-Йоркда БМТ Бош Ассамблеясининг 77-сессияси доирасида Марказий Осиё мамлакатлари ва АҚШнинг «С5+1»форматидаги Вазирлар йиғилиши бўлиб ўтди.
Тадбир давомида Ўзбекистон, Қозоғистон, Қирғизистон, Тожикистон, Туркманистон ва АҚШ ташқи сиёсат идоралари раҳбарлари ўзаро ҳамкорликнинг долзарб масалаларини муҳокама қилган.
Марказий Осиёнинг барқарор иқтисодий тараққиётини таъминлаш мақсадида «С5+1» форматида савдо ва сармоявий алоқаларни кенгайтириш йўллари тўғрисида фикр алмашилди.
Ўзбекистон делегацияси раҳбари, Ташқи ишлар вазири Владимир Норов ўз нутқида «С5+1» муҳим мулоқот механизми эканлигини, унинг доирасидаги ҳамкорлик самарадорлигини ошириш борасида маълум ютуқларга эришилганини қайд этди. Ўзбекистон томонининг «С5+1» доирасидаги ташаббуслари, жумладан, Марказий Осиё мамлакатларида қишлоқ хўжалиги ва тўқимачилик саноати соҳасида халқаро стандартларни жорий этиш, муқобил транспорт йўналишларини ривожлантириш, "Яшил кун тартиби" ни илгари суриш, озиқ-овқат хавфсизлигини таъминлаш борасидаги таклифлар билдирилди.
Томонлар «С5+1» доирасида юқори ва эксперт даражаларида яқин мулоқотни давом эттириш, шунингдек амалий натижаларга эришишга қаратилган аниқ чораларни кўриш бўйича келишиб олган.
Шу билан бирга Қозоғистон томони ушбу форматнинг навбатдаги йиғилишини ўз ҳудудида ўтказишни таклиф қилган.
