Андижонда Нексия–3 икки кишини уриб юборди
Улардан бири 12 ёшли бола бўлган.
Бугун, 25 сентябрь куни Андижон шаҳрида Нексия–3 русумли автомашина икки нафар пиёдани уриб юборди. Ҳолат юзасидан вилоят ИИБ ахборот хизмати маълумот берди.
Воқеа тунги соат 01:00 ларда Андижон шаҳрининг Миллий тикланиш кўчасида юз берган. 1988 йилда туғилган Андижон шаҳрида яшовчи фуқаро Н.О. Нексия–3 русумли автомашинани бошқариб кетаётиб, ўзи билан бир йўналишда йўлнинг қатнов қисмида арава етаклаб кетаётган 2 нафар пиёдалар — 1979 йилда туғилган Т.О. ҳамда 2010 йилда туғилган С.Б.ларни уриб юбориб, йўл-транспорт ҳодисасини содир этган.
Ҳодиса оқибатида ҳар иккала пиёдалар тан жароҳати олиб, шифохонага ётқизилган.
Дастлабки суриштирув ва текширувларга кўра, ҳайдовчида мастлик ҳолати аниқланмаган. Ҳозирда терговга қадар текширув ҳаракатлари олиб борилмоқда.
