Қирғизистон ва Тожикистон чегара постларини олиб ташлашга келишиб олди
Бугун эрталаб томонлар можароларни тугатиш бўйича протокол имзолаганди.
Қирғизистон ва Тожикистон можаролар юз берган чегара ҳудудларда ҳар томондан тўрттадан постни олиб ташлашга келишиб олди. Бу ҳақда Қирғизистон Миллий хавфсизлик давлат қўмитаси раиси Қамчибек Ташиев маълум қилди.
Шунингдек, музокаралар чоғида томонлар қирғиз-тожик чегарасини делимитация ва демаркация қилиш бўйича ишларни тезлаштиришга келишиб олган.
Эслатиб ўтамиз, Қирғизистон ва Тожикистон чегарасида йирик тўқнашувлар 16 сентябрь куни эрталаб бошланганди. Томонлар бир-бирини ўқ узганликда айблади. Қирғизистон томони тўқнашувлар натижасида 62 нафар ўз фуқаролари ҳалок бўлгани ва 198 нафари яраланганини маълум қилган. Тожикистонда эса 41 киши ҳалок бўлган, 30 киши яраланган.
