Чавушўғлу: Путин Эрдоғанга Самарқандда Киев билан музокараларга қайтиш мумкинлигини айтган
Туркия ТИВ раҳбари Украина можароси қандай якунланиши мақсадга мувофиқлигини айтди.
Украина низоси биринчи навбатда Киев учун адолатли тинчлик ўрнатилиши билан якунланиши керак. Бу ҳақда Туркия ташқи ишлар вазири Мавлуд Чавушўғлу Токиодаги матбуот анжуманида маълум қилди.
“Украинадаги можаро адолатли тинчлик ўрнатилиши билан якунланиши керак. Бу биринчи навбатда украиналиклар учун адолатли бўлиши лозим. Олдин айтиб ўтганимдек, Туркия бу ҳудудларни ноқонуний эгалланган деб ҳисоблайди. Аммо биз дипломатик ечим топишдан умидимизни йўқотмаяпмиз”, – деган у.
Шу билан бирга дипломатнинг сўзларига кўра, Путин Эрдоған билан Самарқанддаги учрашувида Украина билан музокараларга қайтишни истисно қилмаган. Чавушўғлу Туркия президенти Москва ва Киев билан бирдек алоқа қилишда давом этишини билдирган.
Аввалроқ Россия президенти матбуот котиби Дмитрий Песков Украина билан музокара ўтказишга асос йўқлигини айтганди.
