5 та туманда ҳокимлар ишдан бўшатилди
Андижон вилоятида 3 та ҳоким лавозимидан озод қилинган.
Президент қарори билан Андижон, Фарғона ва Самарқанд вилоятларининг бир қатор туманларида ҳокимлар ишдан бўшатилди. Бу ҳақда Президент матбуот хизмати хабар берди.
Қайд этилишича, Асака тумани ҳокими Мансурбек Алихонов ва Фарғона тумани ҳокими Шуҳратжон Мўминов ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонунбузилиш ҳолатлари учун эгаллаб турган лавозимидан озод этилган.
Шунингдек, Пахтаобод тумани ҳокими Элёрбек Усмонов ва Нуробод тумани ҳокими Шерали Юлдашев раҳбарлик этикаси қоидаларига риоя этмагани, хизмат ваколатидан четга чиқиб қонунбузилиш ҳолатларига йўл қўйгани учун, Андижон тумани ҳокими Абдужаббор Эгамбердиев эса давлат хизматчиси этикасига номуносиб хатти-ҳаракатлари, раҳбарлик маданиятини сақламагани, ўтказилган қабулларда фуқароларга ҳурматсизликка йўл қўйгани ва фаолиятидаги бошқа камчиликлари учун эгаллаб турган лавозимидан озод этилган.
