Меркель: Путиннинг сўзларини жиддий қабул қилиш керак
Германия собиқ канцлери Россия президентининг ядро қуролини қўллаш ҳақидаги баёноти ҳақида гапирди.
Германия собиқ канцлери Ангела Меркель Путиннинг ядро қуролини қўллаш тўғрисидаги баёнотини жиддий қабул қилишга чақирди. Унинг фикрича, бу заифликни эмас, “сиёсий донолик”ни билдиради.
“Унинг сўзларини жиддий қабул қилинг, буни шунчаки блеф деб енгил қараманг. Бу гапларга жиддий қараш заифлик эмас, сиёсий донолик белгиси”, – деган собиқ канцлер.
Немис ОАВлари бу орқали Меркель Путиннинг 21 сентябрь кунги гапларини назарда тутганини таъкидлаган.
Россия раҳбари ўтган ҳафтада мамлакатда қисман ҳарбий сафарбарлик эълон қилган пайтида РФ ҳудудий яхлитлигига таҳдид туғилган тақдирда барча ҳимоя воситаларидан фойдаланилишини айтганди.
Ҳозирда дунёнинг аксарият давлатлари буни ядро таҳдиди сифатида қабул қилган. АҚШ Москвани “ядро зарбаларининг ҳалокатли оқибатлари”дан огоҳлантирди.
Аввалроқ Қўшма Штатлар собиқ президенти Дональд Трамп дунё тарихдаги энг хавфли паллада турганини айтганди.
