Андижонда фермер хўжалиги раҳбари ИИБ ходимлари томонидан калтаклангани айтилди
У 100 тонна пахта хомашёсини қабул пунктига топширмасдан, ўзининг дала майдонида сақлаб келаётган бўлган.
Ижтимоий тармоқларда Андижон вилоятининг Бўстон туманида ИИБ ходимлари фермерни ургани ҳақида хабарлар тарқалди. Ҳолат юзасидан вилоят ИИБ ахборот хизмати расмий муносабат билдирди.
Қайд этилишича, 24 сентябрь куни Бўстон туманида “Хавфсиз хонадон” профилактик тадбири ўтказилган. Тадбир давомида Нурафшон маҳалласида яшовчи 1962-йилда туғилган Арабов Анарбой Қодиралиевичга қарашли “Баҳодир” фермер хўжалигининг ер майдонидан териб олинган 80-100 тoнна пахта хомашёси қабул пунктига топширилмасдан, хўжалик шийпонида очиқ ҳолда сақланётганлиги аниқланган.
Ушбу фермер хўжалиги раҳбари А.Арабов билан суҳбат ўтказилиб, ундан дала шийпонида нима сабабдан кўп миқдордаги пахта хомашёсини сақлаб келаётганлиги сўралганида пахта хомашёсини биринчи навга топшириш мақсадида қуритиш учун сақлаётганлиги ва қуруқ ҳолга келгандан сўнг топширишини маълум қилган.
Шундан сўнг хўжалик раҳбари А.Арабовга пахта хомашёсини сақлашда ёнғин хавфсизлиги қоидаларига амал қилиниши, уни талон-торож, нес-нобуд бўлишини ва ёнғин чиқиш ҳолатларини олдини олиш мақсадида терилган пахта хомашёсини қабул қилиш учун шартнома тузилган корхоналарга топшириши юзасидан тушунтиришлар берилган.
“Суҳбат жараёнида фермер хўжалиги раҳбари А.Арабов ва унинг фарзанди Б.Арабовларга нисбатан ҳеч қандай жисмоний куч ишлатилмаган, мулкларига шикаст етказилмаган, уларнинг шахсиятига тегадиган сўзлар билан ҳақорат қилинмаган. Фермер хўжалиги раҳбари А.Арабов томонидан суҳбат якуни бўйича ходимларга ҳеч қандай эътирозлар бўлмаган”, — дейилади хабарда.
