Энергетик инқироз Европа давлатлари учун яна бир муаммони вужудга келтириши мумкин
Бу мобил алоқа билан боғлиқ.
Евроиттифоқда кузатилаётган энергетик инқироз мобил алоқа фаолиятида узилишларга сабаб бўлиши мумкин. Бу ҳақда Reuters агентлиги хабар берди.
Агентлик билан суҳбатлашган тўртта Европа телекоммуникация компаниялари раҳбарлари “оғир қишдан” хавотир билдирган. Бу улар ва ҳукуматлар учун ҳақиқий синов бўлиши тахмин қилинган. Ҳозирда барча томонлар энергетик ресурслар етишмовчилигини олдини олишга ҳаракат қилмоқда.
Германия, Швеция ва Франция ўз фуқароларига мобил алоқа узилмаслигига ваъда берган. Ҳозирда бутун Европада 500 мингта телекоммуникация устунлари бор. Уларга ўрнатилган резерв батареялар устунларнинг 30 дақиқа ишлашига имкон беради.
Шу билан бирга Reuters билан суҳбатлашган манбалар кўплаб Европа давлатларида захира тизимлари етишмаётганини айтган. Бу мобил алоқа фаолиятида узилишлар эҳтимолини кучайтиради.
Аввалроқ Россия Украина орқали газ транзитини бутунлай тўхтатмоқчи эканлиги тўғрисида хабар берилганди.
